प्रतिनिधि सभा सदस्य निर्वाचन २०८२

राष्ट्रिय स्वतन्त्र पार्टी (रास्वपा) २०७९ असार ७ गते गठन भएको हो । यो पार्टीका संस्थापक सभापति रवि लामिछाने हुन् । हाल पनि लामिछाने रास्वपाको सभापति छन् । रास्वपाको वरिष्ठ नेता बालेन्द्र शाह तथा उपसभापतिहरूमा डीपी अर्याल र स्वर्णीम वाग्ले छन् । रास्वपाको चुनाव चिह्न 'घण्टी' हो । यो पार्टी २०७९ असार १७ मा निर्वाचन आयोगमा दर्ता भएको हो ।
रास्वपा नेपालीको समतामूलक उन्नतिप्रति कटिबद्ध सामाजिक न्यायसहितको उदार अर्थतन्त्रमा विश्वास गर्ने बहुलवादी लोकतान्त्रिक पार्टी हो । यो पार्टीको ध्येय वैयक्तिक स्वतन्त्रता र मौलिक हकको प्रत्याभूतिपूर्वक पूर्ण लोकतान्त्रिक गणतन्त्रात्मक शासन प्रणाली भित्र विधिमा आधारित जवाफदेहीपूर्ण असल शासन मार्फत समन्यायिक समावेशी समाज निर्माण गर्ने रहेको छ ।
नेपाली जनतामा निहीत राष्ट्रिय सार्वभौमिकतालाई आत्मसात् गर्दै, नेपालको राष्ट्रिय हितलाई सर्वोपरि मानी जनउत्तरदायी, जनसहभागितामूलक लोकतान्त्रिक राज्य शासन व्यवस्था प्रवर्द्धन गर्दै नेपालको संविधानले परिकल्पना गरेअनुसार दिगो शान्ति, सुशासन, विकास र समृद्धिको आकांक्षा पूरा गरी नेपाली जनताले महसुस गर्ने गरी जीवनस्तरमा सुधार ल्याउने यो पार्टीको प्रतिबद्धता रहेको छ ।