Federal Parliament Election 2082

• 2082
• 2079
• 2074

उनी विद्यार्थीकालदेखि नै राजनीतिमा सक्रिय छन् । मुलुकमा प्रजातन्त्र प्राप्तीको आन्दोलनमा सहभागी भएको आरोपमा उनी २०३० सालमा तुलसीपुरस्थित महेन्द्र माविमा पढ्दापढ्दै पक्राउ परे । १३ वर्षकै उमेरमा गिरफ्तार भई १३ दिन हिरासतमा बसे । २०३१ सालमा अञ्चलाधीशको ठाडो आदेशमा २९ दिन हिरासतमा बसे । २०३७ सालमा ५७ दिन अञ्चलाधीशको ठाडो आदेशमा हिरासतमा बसे । २०३३ सालमा राष्ट्रिय मेलमिलापको नीति लिई बीपी कोइराला काठमाडौं ओर्लंदा उनको स्वागतमा सक्रियतापूर्वक खटिनेमध्येका गिरी एक हुन् । २०३४ सालमा कांग्रेस दाङको क्षेत्रीय सभापति, २०३६ सालमा नेविसंघको केन्द्रीय सदस्य, २०३६ सालमै नेविसंघको राष्ट्रिय महाधिवेशन तयारी समिति संयोजक, २०४२ सालमा सत्याग्रह आन्दोलनको केन्द्रीय एक्सन कमिटीको सदस्य, २०४३ सालमा त्रिभुवन विश्वविद्यालय केन्द्रीय क्याम्पसको स्वतन्त्र विद्यार्थी युनियनको महासचिव भए । २०४६ सालदेखि निरन्तर पार्टीको महाधिवेशन प्रतिनीधि एवं महासमिति सदस्य छन् । उनी १२ औं महाधिवेशनदेखि लगातार तेस्रोपटक कांग्रेस केन्द्रीय सदस्य छन् ।

२०५१ सालको प्रतिनिधिसभा निर्वाचनमा उम्मेदवार भई दाङ क्षेत्र नं. २ बाट एमालेका शंकर पोखरेलसँग पराजित भए । २०६४ को संविधानसभा निर्वाचनमा क्षेत्र नं. ५ बाट माओवादीकी शुष्मा शर्मा घिमिरेसँग पराजित भए । २०७० को संविधानसभा निर्वाचनमा एमालेका उत्तरकुमार वलीलाई पराजित गरी संविधानसभा सदस्यमा विजयी भए । २०७४ मा क्षेत्र नं. ३ बाट एमालेका हीराचन्द्र केसीसँग पराजित भए । २०७९ मा विजयी भए । अहिले उनी छैठौंपटक चुनावी मैदानमा छन् ।

२०७० मा पहिलोपटक सांसद निर्वाचित भएपछि उनी २०७३ भदौ १० गते सिंचाइ मन्त्री भए । विशेष जिम्मेवारी : २०६२/०६३ को जनआन्दोलनमा काठमाडौको गोंगबु क्षेत्रको नेतृत्व गरेर जिम्मेवारी निर्वाह गरेका थिए ।