प्रतिनिधि सभा सदस्य निर्वाचन २०८२

नेपाली कांग्रेसको स्थापना विश्लेश्वरप्रसाद कोइराला (बीपी)को नेतृत्वमा भएको हो । यो पार्टीको स्थापना वि. सं. २००३ सालमा भएको हो । कांग्रेस लोकतन्त्रमा विश्वास राख्ने राजनीतिक दल हो । बीपी कोइराला नेतृत्वको नेपाली राष्ट्रिय कांग्रेस र महेन्द्रविक्रम शाह नेतृत्वको नेपाल प्रजातन्त्र कांग्रेस मिलेर २००६ साल चैतमा 'नेपाली कांग्रेस' बनेको हो । कांग्रेसको 'चारतारे झण्डा' र चुनाव चिह्न 'रूख' हो ।

कांग्रेसको स्थापना तत्कालीन राणाशासनको अन्त्य र प्रजातन्त्र स्थापनाका लागि भएको हो । कांग्रेसका सभापतिहरूमा बीपी कोइराला, मातृकाप्रसाद कोइराला, सुवर्णशम्शेर राणा, कृष्णप्रसाद भट्टराई, गिरिजाप्रसाद कोइराला, सुशील कोइराला, शेरबहादुर देउवा भइसकेका छन् । हाल कांग्रेसको सभापति गगनकुमार थापा छन् ।

कांग्रेसले जनतालाई मुलुकको सर्वोच्च र निर्णायक शक्ति मानेर अघि बढ्दै आएको छ । लोकतन्त्रको सुदृढीकरण, संस्थागतीकरण र बहुलवादका मूल्यमा आधारित समाज निर्माण नेपाली कांग्रेसको मूल आधार हो । सुशासन, विधिको शासन, मानव अधिकार, सामाजिक न्याय, आर्थिक समानता र समावेशी लोकतान्त्रिक मूल्य–मान्यताको संरक्षण गर्दै सबै नागरिकका लागि गरिमापूर्ण जीवन सुनिश्चित गर्ने भनी कांग्रेसले प्रतिबद्धता जनाएको छ । राजनीतिक स्थायित्व, आन्तरिक लोकतन्त्र र संगठनात्मक सुदृढीकरण बिना राष्ट्र निर्माण सम्भव हुँदैन भन्ने कांग्रेसको धारणा छ ।